(روزنامہ قدس ـ آنلائن خبر رساں ادارہ) گذشتہ روز یمنی فوج کی جانب سے قابض اسرائیل کے دوسرے بڑے ائیرپورٹ رامون پر کامیاب ڈرون حملوں سے صہیونی ایوانوں میں کھلبلی مچ گئی ہے۔ صہیونی ذرائع ابلاغ ان حملوں کو نہایت تشویشناک قرار دے رہے ہیں۔
یمنی فوج کے ترجمان جنرل یحییٰ سریع نے اعلان کیا کہ آٹھ ڈرون طیاروں کے ذریعے قابض اسرائیل کے مختلف علاقوں پر بڑے پیمانے پر حملے کیے گئے جن میں النقب، ام الرشراش، عسقلان، اشدود، یافا اور رامون ایئرپورٹ شامل تھے۔ صہیونی و امریکی دفاعی نظام حملے کو روکنے میں ناکام رہا۔جنرل سریع نے خبردار کیا کہ یمنی فوج اپنی کارروائیاں مزید تیز کرے گی۔
صہیونی اخبار یروشلم پوسٹ نے لکھا کہ رامون ایئرپورٹ کو نشانہ بنانا یمنی فورسز کی ایک غیر معمولی کارروائی تھی جو پیچیدہ حکمتِ عملی کے ساتھ انجام دی گئی۔
اخبار کے مطابق سفاک اسرائیلی فضائیہ اب تک یہ واضح نہیں کر سکی کہ ڈرون کس طرح ایئرپورٹ تک پہنچا۔
رپورٹ میں مزید کہا گیا کہ ایران کے ساتھ بارہ روزہ جنگ کے بعد قابض اسرائیلی فضائی دفاع میں نمایاں کمزوری آئی ہے،۔ یمنی فورسز نے ثابت کیا ہے کہ وہ غاصب اسرائیل کو اچانک اور خطرناک حملوں سے حیران اور پریشان کرسکتی ہیں۔
