(روزنامہ قدس ـ آنلائن خبر رساں ادارہ) غزہ کے سول ڈیفنس کے ترجمان، محمود بصل نے کہا ہے کہ قابض اسرائیلی فوج نے رفح اور شمالی غزہ کی دونوں گورنریوں کو مکمل طور پر تباہ کر دیا ہے۔
جمعرات کی شب ایک ٹی وی انٹرویو میں محمود بصل نے واضح کیا کہ قابض فوج نے غزہ شہر کے الزیتون محلے کے جنوبی حصے کو بھی مکمل طور پر ویران کر دیا ہے۔
انہوں نے بتایا کہ قابض اسرائیلی فوج روبوٹ بمبار، بلڈوزر اور وحشیانہ بمباری کا استعمال کر کے الزیتون محلے کے گھروں کو مسمار کر رہی ہے اور شہر کے مشرقی علاقوں میں بھی وسیع پیمانے پر تباہی پھیلا چکی ہے۔
بڑی تعداد میں تصاویر اور ویڈیوز سامنے آئی ہیں جنہوں نے الزیتون محلے میں ہونے والی وسیع تباہی کو واضح کیا ہے جہاں عمارتیں ملبے کا ڈھیر بن چکی ہیں اور ہر طرف ملبہ بکھرا ہوا ہے۔
گزشتہ اگست کے آخر میں اپنے ایک بیان میں، بصل نے کہا تھا کہ قابض اسرائیلی فوج نے صرف چھ اگست سے اب تک الزیتون محلے میں پندرہ سوسے زائد عمارتیں مکمل طور پر تباہ کر دی ہیں جبکہ جبالیہ پر مسلسل بمباری اور روبوٹ دھماکوں کا سلسلہ جاری ہے۔
انہوں نے وضاحت کی کہ الزیتون محلے کا جنوبی حصہ مکمل طور پر زمین بوس ہو چکا ہے اور وہاں کوئی عمارت باقی نہیں رہی، جبکہ علاقے کے اسی فیصد مکینوں کو جبری طور پر بے گھر کر دیا گیا ہے۔
بصل نے مزید بتایا کہ قابض فوج روزانہ اوسطاً سات بارودی دھماکے کرتی ہے جس میں کھدائی کرنے والی مشینیں، بھاری مشینری اور روبوٹ بمبار استعمال کیے جاتے ہیں۔ اس کے ساتھ، ڈرون طیارے کواڈ کاپٹر گھروں کی چھتوں پر بارودی مواد گراتے ہیںجس سے تباہی کئی گنا بڑھ گئی ہے۔
یکم اگست سے قابض اسرائیلی فوج نے الزیتون محلے پر ایک وسیع حملہ شروع کر رکھا ہے جس میں گھروں کو روبوٹ بمبار سے اڑانا، توپ خانے کی گولہ باری، اندھا دھند فائرنگ اور جبری بے دخلی شامل ہے۔ یہ سب کچھ اس منصوبے کے تحت کیا جا رہا ہے جس کا مقصد غزہ کے باقی ماندہ حصے پر دوبارہ قبضہ جمانا ہے۔
امریکی پشت پناہی سے قابض اسرائیل نے محصور غزہ میں شہریوں اور بے گھر افراد کے خلاف چھ سو ننانویں روز بھی نسل کشی، جنگی جرائم اور ہولناک قتلِ عام کا سلسلہ بدستور جاری ہے۔
غزہ شہر اس وقت شدید فوجی کشیدگی کی لپیٹ میں ہے خاص طور پر شمالی اور مشرقی علاقے جہاں روبوٹ دھماکوں اور شدید فضائی حملوں سے عمارتیں ملبے کا ڈھیر بن گئی ہیں اور ہزاروں لوگ مغربی حصے کی طرف نقل مکانی پر مجبور ہو گئے ہیں۔
جمعرات کی صبح قابض اسرائیل کے جنگی طیاروں نے غزہ شہر پر کئی سفاکانہ فضائی حملے کیے اور شیخ رضوان تالاب کے مشرق میں ایک مقام کو نشانہ بنایا۔
