(روزنامہ قدس ۔آنلائن خبر رساں ادارہ )قابض اسرائیلی ریاست کی جانب سے اہل فلسطین کو مسلسل مسائل میں مبتلا رکھنے کا سلسلہ جاری،غزہ پاور پلانٹ کو ایندھن کی سپلائی مزید کم کرنے کا فیصلہ کرلیا۔
تفصیلات کے مطابق قابض صہیونی ریاست کے جانب سے فلسطینیوں کو مصائب اور تکالیف دیئے جانے کا سلسلہ جاری ہے،پیر کے روز فلسطینیوں کو بجلی مہیا کرنے والے غزہ کے واحد پاور پلانٹ کو ایندھن کی سپلائی مزید کم کرنے کا اعلان کردیا۔
اسرائیلی حکومت کے رابط کار برائے حکومتی اقدامات نے سماجی رابطے کی ویب سائٹ فیس بک پر ایک پوسٹ میں اعلان کیا کہ غزہ کی جانب سے کئے گئے مبینہ راکٹ حملوں کے جواب میں غزہ کے پاور پلانٹ کو دی جانے والے ایندھن کی مقدار نصف کی جا رہی ہے جو کہ غیر معینہ مدت کے لیے ہوگی۔
یاد رہے کہ غزہ کے شہریوں کے لیے میسر واحد پاور پلانٹ سے پہلے ہی بجلی کی فراہمی معمول کے مطابق نہیں ہے اور غزہ کے رہائشیوں کو 16 گھنٹے یومیہ لوڈ شیڈنگ کا سامنا ہے اور حالیہ اسرائیل اقدام کے بعد اس میں مزید اضافے کا واضح امکان ہے۔