(روزنامہ قدس ۔آن لائن خبر رساں ادارہ) حماس رہنما نے کہا کہ اس سے قبل بھی صہیونی دشمن نے غزہ میں الجزیرہ کے دفتر پر بمباری اور الشیخ جراح میں الجزیرہ کی نامہ نگار گیوارا البدیری کو زخمی کیا تھااور اب ابو عاقلہ کی کئی بار ٹارگٹ کلنگ کی ناکام کوشش کے بعدانہیں سازش کے ذریعے قتل کیا۔
تفصیلات کے مطابق محصور علاقے غزہ کی پٹی میں اسلامی تحریک مزاحمت حماس کےسربراہ یحیی السنوار نے الجزیرہ ٹی وی چینل کی فلسطینی صحافی خاتون شیرین ابو عاقلہ کی صہیونی فوج کے ہاتھوں شہادت پر اظہار تعزیت کیلیے ٹی وی چینل کے دفتر کا دورہ کیا اور انتظامیہ سے بات چیت کے دوران ابو عاقلہ کی شہادت کے واقعے پر افسوس کا اظہار کیا۔
یحییٰ السنوار نے الجزیرہ کے دفتر میں اپنے تعزیتی بیان میں کہا کہ شیرین ابو عاقلہ کی شہادت پر اپنے صحافی بھائیوں کے ساتھ یکجہتی کا اظہار کرنے کے ساتھ ساتھ اس مجرمانہ واقعے کی مذمت کرتے ہیں۔
السنوارنے کہا کہ اس سے قبل بھی صہیونی دشمن نے غزہ میں الجزیرہ کے دفتر پر بمباری اور الشیخ جراح میں الجزیرہ کی نامہ نگار گیوارا البدیری کو زخمی کیا تھااور اب ابو عاقلہ کو سازش کے ذریعے قتل کیا، ابو عاقلہ کی کئی بار ٹارگٹ کلنگ کی ناکام کوشش کی گئی یہاں تک کہ ان کے جنازے کے جلوس پر بھی حملے کیے گئے۔