(روزنامہ قدس ۔آن لائن خبر رساں ادارہ) مقامی ذرائع نےبتایاکہ صہیونی آباد کاروں نے غیر قانونی صہیونی بستی سے متصل فلسطینیوں کی زرعی اراضی میں بھیڑوں کا ریوڑ چرایا اور باغات میں زیتون کےدرختوں اور پودوں کو تباہ کردیا۔
ذرائع کے مطابق صہیونی آباد کاروں نے گذشتہ روز علی الصبح جنوبی مقبوضہ مغربی کنارے میں بیت لحم کے جنوب میں الخضر قصبے میں فلسطینی باشندوں کے ملکیتی زیتون کےدرجنوں درختوں سمیت سینکڑوں پودوں اور زرعی فصلوں کو تباہ کر دیا۔
مقامی ذرائع نےبتایاکہ صہیونی آباد کاروں کےایک منظم گروپ نے سیدی بوعز کی غیر قانونی بستی سے متصل فلسطینیوں کی زرعی اراضی میں بھیڑوں کا ریوڑ چرایا اورفلسطینیوں کی ملکیتی زیتون کے باغات میں 300سے زائد پودے اورکئی درختوں سمیت زرعی فصلیں تباہ کردیں جن میں ایک فلسطینی شہری ہشام بر میل کی 15 دونم اراضی بھی شامل ہے۔
خیال رہے کہ صہیونی شر پسند آباد کار روزانہ کی بنیاد پر مقبوضہ علاقوں میں نام نہاد "پرائس ٹیگ” کے بینر تلے فلسطینیوں پر حملہ کرتے ہیں اور اسرائیلی قابض حکام کی جانب سے اس طرح کےصہیونی حملوں میں ملوث آبادکاروں کو ہمیشہ سزا سے بچا لیا جاتا ہے، ان حملوں میں اکثر فلسطینیوں کی املاک پر حملے، ان کی گاڑیوں کے ٹائروں کو کاٹنا،گاڑیوں اور گھروں کی دیواروں پر عرب مخالف نعرے پینٹ کرنے کے علاوہ فلسطینی کسانوں کے درختوں کو کاٹنا شامل ہیں۔