(روزنامہ قدس ۔آن لائن خبر رساں ادارہ) دونوں رہنماؤں نے خطے میں امن کے حصول، سلامتی، استحکام،ترقی اور خوشحالی کے لیے خطے کے عوام کی امنگوں کو پورا کرنے کے لیے ابراہیمی امن معاہدے پرعملدرآمد جاری رکھنے کی اہمیت کا اعادہ کیا۔
تفصیلات کے مطابق متحدہ عرب امارات کے خارجہ اور بین الاقوامی تعاون کے وزیر شیخ عبداللہ بن زاید آل نھیان نے قابض ریاست اسرائیل کے سرکاری دورےپر پہلی مرتبہ اسرائیل پہنچ کراپنے ہم منصب وزیر خارجہ یائر لیپد سے ملاقات کی۔
ملاقات میں دونوں وزراء خارجہ نے باہمی مفاد کے امور اور یوکرین بحران سمیت تازہ ترین علاقائی اور عالمی صورتحال پر تبادلہ خیال کیاساتھ ہی دونوں ملکوں کے مابین تعلقات معمول پر لانے والے معاہدہ ابراہیمی کے نتیجے میں حاصل ہونے والے مستقبل کے ثمرات پر بات چیت کی۔
وزیر خارجہ شیخ عبداللہ بن آل نہیان نے کہا کہ ہم دونوں ممالک کے دوطرفہ تعلقات کو مضبوط بنانے اور مختلف سطحوں پر اپنی ترقیاتی شراکت داری کو بڑھانے کے خواہاں ہیں اورمزید ترقی کیلیے دونوں ممالک اپنے لوگوں اور خطےکے خوشحال مستقبل کے لیے مل کر کام کر رہی ہیں۔
خیال رہے کہ اماراتی وزیرخارجہ اس وقت قابض ریاست اسرائیل میں امریکہ، بحرین، مراکش، مصر اور متحدہ عرب امارات کے وزرائے خارجہ کے ساتھ ایک اہم سربراہی اجلاس میں شرکت کیلیے پہنچے ہیں جس کی میزبانی اسرائیل کر رہا ہے۔