(روزنامہ قدس ۔آن لائن خبر رساں ادارہ) اسرائیل اور امارات میں تعلقات میں گرمجوشی کے باوجود سکیورٹی کے معاملات پر کافی اختلاف پایا جاتا ہےاور اس سکیورٹی بحران کی وجہ سے یہ صہیونی ہوائی کمپنیاں ابوظہبی ایئرپورٹ پر اپنی تمام پروازیں چلائیں گی۔
ذرائع کے مطابق گذشتہ روز اسرائیل کے عبرانی چینل 7 نے اپنی ایک رپورٹ میں اعلان کیا ہے کہ قابض ریاست اسرائیل اور متحدہ عرب امارات کے درمیان پرواز کرنے والی اسرائیلی ایئرلائنز کی پروازوں کو محفوظ بنانے کے طریقہ کار پرمتعدد اختلافات سامنے آئے ہیں جس کے باعث دبئی جانے والی یہ پروازیں 8 مارچ سے معطل کر دی جائیں گی اور اس کے بجائے تمام پروازیں ابوظہبی اتریں گی۔
رپورٹ کے مطابق صہیونی ایئرلائنز آرکیہ نے بھی اعلان کیا ہے کہ دبئی کے لیے ان پروازوں کو بحال رکھنے کا کوئی حل تلاش نہیں کیاجا سکاہے جس کے نتیجے میں تقریباً 12 دنوں میں تل ابیب کے بن گورین ایئرپورٹ سے دبئی جانے والی اسرائیلی کمپنیوں کی یہ تمام پروازیں بند کر دی جائیں گی۔
واضح رہے کہ اسرائیل اور امارات میں دونوں فریقوں کے درمیان گرمجوشی سے تعلقات جاری ہونے کے باوجود سکیورٹی کے معاملات پر کافی اختلاف پایا جاتا ہےاور اس سکیورٹی بحران کی وجہ سے یہ صہیونی ہوائی کمپنیاں ابوظہبی ایئرپورٹ پر اپنی تمام پروازیں چلائیں گی جبکہ ان میں سوار مسافر بقیہ راستہ فراہم کردہ بسوں سے طے کریں گےجو تقریباً 45 منٹ کاہوگا۔