(روزنامہ قدس ۔آن لائن خبر رساں ادارہ) تحریک حماس نے کہا کہ ہم اسیروں کو تنہا نہیں چھوڑیں گے اور تمام دستیاب ذرائع سے اسیروں کا دفاع کریں گے تاہم تحریک صہیونی حکمرانوں کو خبردار کر تی ہے کہ قیدیوں کے ساتھ غیر انسانی سلوک کے نتائج اسرائیل کو بھگتنے ہونگے.
تفصیلات کے مطابق مقبوضہ فلسطین میں صہیونی ریاستی دہشت گردی کے خلاف بر سر پیکار اسلامی مزاحمتی تحریک حماس نے صہیونی حکام کو خبر دار کرتے ہوئے کہا ہے کہ جیلوں میں قید فلسطینی بھوک ہڑتالیوں کی زندگی کی تمام تر ذمہ داری صہیونی حکام پر ہے۔
انہوں نے کہا کہ 6 ستمبر کو جلبوع ہائی سیکیورٹی جیل سے چھ فلسطینی قیدیوں کے فرار ہونے اور اسرائیلی سیکیورٹی اسٹیبلشمنٹ کو دھچکا پہنچانے کے بعد قابض حکومت نے فلسطینی قیدیوں کے خلاف اپنا کریک ڈاؤن تیز کردیا ہے۔
حماس نے کہا کہ ناجائز ریاست کے حکمران جانتے ہیں کہ حماس اسیروں کو تنہا نہیں چھوڑے گی، ہم تمام دستیاب ذرائع سے اسیروں کا دفاع کریں گےتاہم تحریک صہیونی حکمرانوں کو خبردار کر تی ہے کہ قیدیوں کے ساتھ غیر انسانی سلوک کے نتائج اسرائیل کو بھگتنے ہونگے ۔
واضح رہے کہ اسلامی مزاحمتی تحریک حماس نے متعدد بار اور مختلف مواقع پر فلسطینی قیدیوں کی فوری رہائی کی ضرورت پر زور دیا ہے لیکن اسرائیلی حکام کی ہٹدھرمی کے باعث قیدیوں کے تبادلے کے عمل پر بالواسطہ مذاکرات میں تاحال کامیابی نہیں ہوسکی ہے۔