(روز نامہ قدس ۔آنلائن خبر رساں ادارہ ) کانفرنس سے خطاب میں مولانا فتح اللہ عباد نے فورم کے اغراض ومقاصد بیان کرتے ہوئے کہا کہ مسئلہ فلسطین صرف فلسطینی عوام ہی نہیں بلکہ پوری دنیا بالخصوص امت مسلمہ کا مشترکہ اہم ترین مسئلہ جبکہ فلسطین مسلمانوں کا قبلہ اول اور ہمارے نبی کریم ؐ کا مقام معراج ہے۔
تفصیلات کے مطابق گذشتہ روزمسئلہ فلسطین کے حوالے سےعوام میں بھرپور آگہی پیدا کرنےکے لیے سول سوسائٹی اور دینی قیادت کے اشتراک سےپاک فلسطین فورم کانفرنس کا انعقاد کیاگیا جس میں اعلان کیا گیا کہ پاکستان کی تمام سیاسی، مذہبی، عوامی جماعتوں، صحافی، وکلائ ، تاجروں، طلبہ یونینز سمیت اداروں کے ساتھ مل کر ایک وسیع تر نیٹ ورک قائم کیا جائے گا۔
پاکستان فلسطین فورم کا مرکزی دفتر اسلام آباد میں ہوگا جبکہ ملک کے دیگر شہروں میں تنظیم کے ذیلی دفاتر بنائے جائیں گے۔
کانفرنس میں مولانا فتح اللہ عباد چیئرمین اور ڈاکٹر عطاء الرحمن وائس چیئرمین منتخب ہوئے جبکہ دیگر ممبران میں ندیم احمد خان، مولانا گلزار نعیمی، ڈاکٹر صابرابومریم ،قاری خلیل الرحمن اور ڈاکٹر محمود الحق شامل ہیں۔
پاک فلسطین فورم کے نو منتخب اور بانی چیئرمین مولانا فتح اللہ عباد نےاپنے خطاب میں فورم کے اغراض ومقاصد بیان کرتے ہوئے کہا کہ مسئلہ فلسطین صرف فلسطینی عوام ہی نہیں بلکہ پوری دنیا بالخصوص اور امت مسلمہ کا مشترکہ اہم ترین مسئلہ ہے، فلسطین مسلمانوں کا قبلہ اول اور ہمارے نبی کریم ؐ کا مقام معراج ہے۔
انہوں نے کہا کہ غاصب اسرائیلی صہیونی قوتیں عدالتوں کا سہارا لے کر مسجد اقصی میں مسلمانوں کے داخلے کو محدود کرکے یہودی طرز پر عبادت کرنے کی کوششیں کر رہے ہیں جبکہ ایسا کرنا بین الاقوامی معاہدوں اور اقوام متحدہ کی قراردادوں کے خلاف ہے۔
ہم عنقریب مسجد اقصی اور بیت المقدس کے بارے میں آگہی مہم کے طورپرملک بھرمیں کانفرنسز، سینمارز، اور تعارفی نمائشیں بھی کریں گے اورساتھ ہی مسئلہ کشمیر کے حوالے سے بھی اپنی آواز اٹھاتے رہیں گے۔
خیال رہے کہ پاک فلسطین فورم کے چیئرمین مولانا فتح اللہ عباد ایک تجربہ کار سیاسی اور مذہبی رہنما ہیں اور گذشتہ دو دہائیوں سے استحکام پاکستان اورعالمی امن کے لئے کوشاں ہیں۔