(روزنامہ قدس ۔آنلائن خبر رساں ادارہ) محبوبہ مفتی نے کہا ہے کہ سیکیورٹی اور کورونا وبا کا بہانا بناکر مقبوضہ کشمیر میں مسجدوں کو تالے لگائے گئے ہیں جنہیں فوری طور پر کھولا جائے۔
کشمیر میڈیا سروس کی جاری کردہ اطلاعات کے مطابق گذشتہ روز بھارتی تسلط کا شکار مقبوضہ کشمیر میں سابق وزیر اعلیٰ محبوبہ مفتی نے اپنے ایک بیان میں بھارتی جارحانہ رویےکی ایک اور مثال دنیا کےسامنے بے نقاب کر تے ہوئے انکشاف کیا کہ مقبوضہ وادی میں بھارتی حکمرانوں نے سیکیورٹی اور کورونا وائرس کی وباء کے پھیلاؤ کا بہانہ بناکر کشمیریوں سے ہر طرح کی مذہبی آزادی چھین لی ہے اور نمازیوں کو جمعہ کی نماز کی ادائیگی کے لیے بھی مسجد میں اجتماعات سے روک دیا گیا ہے جسے بر داشت نہیں کیا جائے گا۔
خیال رہے کہ مقبوضہ کشمیر میں دیگر مذاہب کی عبادت گاہیں کھول دی گئی ہیں اور عوامی اجتماعات جاری ہیں تاہم بھارتی فوج کی جانب سے مساجد پر تالےلگائے گئے ہیں جس کے بعدپوری وادی اور بالخصوص درگاہ حضرت بل اور سری نگر کی جامع مسجد میں داخلےسے کشمیری مسلمان محروم ہوگئے ہیں۔