(روزنامہ قدس ۔آنلائن خبر رساں ادارہ) صہیونی ریاست میں ایک روزقبل 2366 افراد کے کورونا ٹیسٹ مثبت آئے تھے جبکہ دوسرے دن 11322 ٹیسٹ کے نتیجے میں مزید1305 افراد میں عالمی وباء کے اثرات پائے گئے ہیں۔
تفصیلات کے مطابق ایک روز قبل صہیونی ریاست اسرائیل کی وزارت صحت کی کورونا وائرس کے حوالے سے جاری کردہ یومیہ رپورٹ کے مطابق چوبیس گھنٹوں کے دوران فلسطینی علاقوں میں کوروناوائرس سے متاثرہ2366 کیسز کی تصدیق کی گئی تھی جس کے بعد حکومتی سطح پراحتیاطی تدابیر اختیار کر نے کے خاص احکامات جاری کردیے گئے تھے جس کے تحت ماسک کے استعمال اور سماجی فاصلے کو لازمی قرار دیا گیا ہے تاہم وزارت صحت کی جانب سے جاری کردہ تازہ رپورٹ کے مطابق صہیونی ریاست میں 11322 ٹیسٹ کے نتیجے میں مزید1305 افراد میں عالمی وباء کے اثرات پائے گئے ہیں جس کے بعد اسرائیلیوں میں کورونا سے بچاؤ کی ویکسینیشن کے مکمل کورس کے باوجود کورونا وائرس کی تشخیص کے بعد خوف پھیل گیا ہے اور زیادہ تر افراد دوبارہ گھروں میں محصور ہو گئے ہیں۔
واضح رہے کہ صہیونی ریاست میں کورونا کے پھیلاؤ کے اوائل میں ہی ہر اسرائیلی کو ویکسنیشن کی سہولیات مہیا کی گئی تھیں جس کے باعث اسرائیل وہ پہلا ملک بن گیا تھا کہ جس نے اپنی عوام کو سب سے پہلے کورونا سے بچاؤ کی ویکسینیشن دی تھی اسی کے ساتھ اسرائیل ہی وہ ریاست ہے کہ جس نے غزہ کی پٹی کے محصور فلسطینی شہریوں سے 50000 امدادی ویکسین کو پہنچنے سے روکا تھا ، تاہم یہ قابل زکر ہے کہ تمام احتیاطوں کے باوجود اسرائیل میں کورونا کی وباء دوبارہ سر اٹھا رہی ہے۔