(روزنامہ قدس ۔آنلائن خبر رساں ادارہ) صہیونی فوج کی جانب سے مظاہرین کو منتشر کر نے کے لیے بھاری مقدار میں آنسو گیس کی شیلنگ کی گئی تاہم مظاہرین نے نعرے بازی جاری رکھی جس کے نتیجے میں صہیونی فوج نے فلسطینیوں پر لاٹھی جارج کی اور بے دریغ ہر عمر کے افراد کو تشدد کا نشانہ بنایا۔
ذرائع کے مطابق گذشتہ روز مقبوضہ فلسطین میں کئی مقامات پر اسرائیلی جیلوں میں قیدیوں کے اہل خانہ سے ملاقات پر پابندی اور جاری مظالم کے خلاف مظاہرین نےاحتجاج کیا جس میں ہزاروں فلسطینی باشندوں نے شرکت کی۔
احتجاج میں شریک فلسطینیوں نے ہاتھوں میں صہیونی ریاست کے خلاف پلے کارڈاور فلسطینی جھنڈے اٹھا رکھے تھے جبکہ مظاہرین کی جانب سے قابض ریاست اور فوج کے خلاف شدید نعرے بازی کی گئی۔
صہیونی فوجی تشدد کے باعث 28 سے زائد فلسطینی باشندوں کو سنگین نوعیت کی چوٹین آئیں جس کے باعث انہیں اپنی مدد آپ کے تحت ہسپتال منتقل کر دیا گیا ہے ۔
اب تک کی موصول ہونے والی اطلاعات کے مطابق زخمی فلسطینیوں میں سے 6 افراد کی ہڈیوں کو شدید نقصان پہنچا ہے جبکہ دیگر فلسطینیوں کو ابتدائی طبی امداد فراہم کرنے کے بعد گھروں کو بھیج دیا گیا ہے۔