(روز نامہ قدس ۔آنلائن خبر رساں ادارہ ) صیہونی وزیراعظم نے امریکی کمپنی کے فلسطین کے مقبوضہ علاقوں میں کام بند کرنے کے فیصلے پر سخت برہمی کا اظہا رکرتےہوئے کہا ہے کہ یہ کوئی معمولی فیصلہ نہیں ہے اس کے اثرات بہت دور تک جائیں گے۔
قابض اسرائیلی وزیر اعظم نفتالی بینیٹ نے امریکا کی ایک ڈیری کمپنی کی طرف سے غرب اردن میں قائم اسرائیل کی غیرقانونی کالونیوں میںکام بندکرنے اور اسرائیل کے بائیکاٹ کے فیصلےپر انتہائی تشویش کا اظہا رکرتے ہوئے کہا ہے کہ امریکی ’آئس کریم کمپنی بین اینڈ جیری‘ کا یہ فیصلہ انتہائی سنجیدہ معاملہ ہے۔
انہوں نے کہا یہ اقدام ایسا ہے جس کے قانونی حیثیت سےسخت گہرے مضمرات مرتب ہوں گے۔ امریکی کمپنی کی طرف سے بائیکاٹ کے فیصلے کے خلاف اسرائیلی شہریوں کو قانونی چارہ جوئی کا حق حاصل ہوگا۔
واضح رہے کہ اس سے قبل امریکی محکمہ خارجہ کے ترجمان نیڈ پرائس نے اس فیصلے کو کمپنی کا اپنا فیصلہ قراردیتے ہوئے اس پر تبصرہ کرنے سے انکار کردیا تھا تاہم انھوں نے کہا تھا کہ امریکہ اسرائیل کےمعاشی بائیکاٹ کی عالمی تنظیم بی ڈی ایس کو مستردکرتا ہے اور اس کی سرگرمیوں کو غیر قانونی سمجھتا ہے۔