(روز نامہ قدس ۔آنلائن خبر رساں ادارہ ) حماس کے ترجمان نے کہا ہے کہ صہیونی حکام غزہ کی پٹی پر فوج کشی کی دھمکیاں دے کر اسرائیلیوں کو ایسے خواب بیچ رہے ہیں جن کی کوئی تعبیر نہیں جبکہ فلسطینی قوم اور مزاحمتی گروہوں کو دشمن کی دھمکیوں کی کوئی پرواہ نہیں۔
تفصیلات کے مطابق گذشتہ روز اسلامی تحریک مزاحمت حماس کے ترجمان حازم قاسم اپنے جاری کردہ بیان میں اسرائیلی وزیر دفاع کے دھمکی آمیز بیان پرکہا ہے کہ بینی گینٹز بار بار غزہ کی پٹی پرچڑھائی کی دھمکی دے کر مئی میں قابض فوج کی غزہ کی پٹی پرجارحیت کے دوران بد ترین ناکامی اور شکست کو چھپانے کے ساتھ ساتھ قابض فوج کے پست حوصلے کو بلند کرنے کی کوشش میں ہیں۔
حماس کے ترجمان نے کہا کہ صہیونی حکام غزہ کی پٹی پر فوج کشی کی دھمکیاں دے کراسرائیلیوں کو ایسے خواب بیچ رہے ہیں جن کی کوئی تعبیر نہیں اور دوسری جانب فلسطینی قوم اور فلسطینی مزاحمتی قوتوں کو دشمن کی دھمکیوں کی کوئی پرواہ نہیں۔
خیال رہے کہ اسرائیلی وزیر دفاع بینی گینٹز نے اسرائیل کے عبرانی ٹی وی چینل کو دیے گئے انٹرویو میں کہا تھا کہ غزہ کی پٹی سے راکٹ حملے اور آتش گیر غبارے پھینکے جانے کا سلسلہ نہ رکا تو اسرائیلی فوج کو غزہ پر حملے کا حکم دیا جائے گا۔
واضح رہے کہ صہیونی فوج نے غزہ کی پٹی پر11 مئی سے 21 مئی تک مسلسل دن رات بمباری کی جس کے نتیجے میں دو سو سے زائد بےگناہ فلسطینی شہید اور ڈیڑھ ہزار سے زائد زخمی ہوگئے تھے۔ فلسطینی مزاحمتی قوتوں نے قابض فوج کی جارحیت کے خلاف دشمن پر ہزاروں راکٹ برسا کر دشمن کو شکست سے دوچار کیا ہے۔