(روز نامہ قدس ۔آنلائن خبر رساں ادارہ ) ڈاکٹر صابر ابو مریم سےملاقات میں مفتی گلزار نعیمی نے کہا کہ پاکستانی قوم فلسطین اور کشمیر کے مظلوم عوام کے ساتھ ہے۔
فلسطین فاؤنڈیشن پاکستان کے سیکرٹری جنرل نےگذشتہ روز جماعت اہل حرم کے سربراہ اور جامعہ نعیمیہ کے سرپرست اعلی مفتی گلزار نعیمی سے جامعہ نعیمیہ اسلام آباد میں ملاقات کی۔ اس موقع پر ان کے ہمراہ وفد میں مختار بلوچ، محمد رضا اور دیگر بھی موجود تھے۔
ملاقات کے دوران گفتگو کرتے ہوئے مفتی گلزار نعیمی کا کہنا تھا کہ افسوس ناک بات ہے کہ فلسطین کے مظلوم عوام اسرائیل اور امریکہ کے ظلم کی چکی میں پس رہے ہیں اور خطے کی عرب ریاستیں اسرائیل کو تسلیم کر کے فلسطینیوں اور پوری مسلم امہ کی پیٹھ میں خنجر گھونپ رہی ہیں۔
مفتی گلزار نعیمی نے کہا کہ پاکستانی قوم فلسطین اور کشمیر کے مظلوم عوام کے ساتھ ہےاور بطور مسلمان اور پاکستان کا شہری ہونے کے ناطے ہم سب کا قومی فریضہ ہے کہ فلسطین اور کشمیر کے مظلوم عوام کی حمایت جاری رکھیں۔
اس موقع پر فلسطین فاؤنڈیشن پاکستان کے سیکرٹری جنرل ڈاکٹر صابر ابو مریم نے مفتی گلزار نعیمی کا شکریہ ادا کرتے ہوئے کہا کہ فلسطین کا مسئلہ پوری مسلم امہ اور انسانیت کا مسئلہ ہے ہم سب کو باہمی اتحا دکے ساتھ آگے بڑھتے ہوئے اس مسئلہ کی حمایت جاری رکھنا ہو گی تاکہ دشمن کی تمام سازشوں کو بھی اپنے اتحاد سے ناکام بنایا جاسکے۔