(روز نامہ قدس ۔آنلائن خبر رساں ادارہ ) صیہونی ریاست کے صحافی نے انکشاف کیا ہے کہ نومنتخب صیہونی وزیراعظم نے مصر کو پیغام بھیجا ہے کہ اگر غزہ سے آتش گیر غبارے اسرائیل بھیجے گئے تو امن کے طویل مدتی معاہدوں کو آگے بڑھانا ممکن نہیں ہوگا۔
تفصیلات کےمطابق صیہونی ریاست اسرائیل کے معروف صحافی دورون كدوش نے انکشاف کیا ہے کہ قابض ریاست میں نو منتخب ہونے والے وزیراعظم نفتالی بینیٹ نے مصر کو آگاہ کیا ہے کہ اگر مقبوضہ فلسطین کے محصور شہر غزہ سے قابض ریاست اسرائیل میں آتشگیر غبارے یا کوئی بھی ایسی پرتشدد کارروائی کی گئی جس سے اسرائیل کو نقصان کا اندیشہ ہو ایسی صورتحال میں غزہ کے ساتھ حالیہ طے پانے والے تمام طویل مدتی امن معاہدے اور مذاکرات کو جاری رکھنا ممکن نہیں ہوگا۔
صیہونی ریاست کے ملٹری انٹلی جنس ڈویژن "امان” کے سابق سربراہ میجر جنرل آموس یادلن کا کہنا ہے کہ ہم نے غزہ سے آتشگیر غباروں کی تیاری کی اطلاعات وصول کی ہیں اگر ان خبروں میں صداقت ہوئی تو حالات ویسے نہیں رہیں گے جس کیلئے معاہدے کیئے گئے ہیں ۔