(روز نامہ قدس ۔آنلائن خبر رساں ادارہ ) صیہونی ریاستی دہشتگردی اور وحشیانہ بمباری کا نشانہ بننے والے مقبوضہ فلسطین کے محصور شہر غزہ کی تعمیرات اور بحالی کیلئے مصری حکومت نے قابل تحسین اقدام اٹھایا ہے۔
مصری حکومت کی جانب سے گذشتہ روز تعمیراتی مشینری، تعمیراتی سامان اور ماہرین تعمیرات پر مشتمل ٹیمیں اسرائیلی جارحیت کا نشانہ بننے والے فلسطین کے جنگ زدہ شہر غزہ پہنچ گئے جو صیہونی ریاستی دہشتگردی اور بمباری سے ہونے والی تباہی کے بعد ملبہ ہٹانے اور تعمیراتی کام شروع کریں گے۔
مقامی فلسطینی ذرائع نے بتایا کہ مصرسے ماہرین اور تعمیراتی مشینری غزہ کی واحد بین الاقوامی گذرگارہ رفح سے غزہ لائی گئی، مصر کے اس اقدام کا مقصد جنگ زدہ فلسطینی علاقے میں ہونے والی تباہی کے بعد ملبہ ہٹانا اور تعمیر نو کا کام شروع کرنے میں مدد دینا ہے۔ مصر سے آنے والی مشینری تباہ ہونے والی عمارتوں کا ملبہ صاف کرے گی۔خیال رہے کہ 10 سے 21 مئی کے دوران اسرائیلی فوج نے غزہ کی پٹی پر وحشیانہ بمباری کی جس کے نتیجے میں بڑے پیمانے پر عمارتیں تباہ ہوئی ہیں۔ مصر نے 18 مئی کو غزہ کی پٹی کی تعمیر نو کے لیے 50 کروڑ ڈالر کی رقم ادا کرنے کا اعلان کیا تھا۔