(روز نامہ قدس ۔آنلائن خبر رساں ادارہ ) شیخ جرح کے دورے پر پہنچنے والی اقوام متحدہ کی ٹیم نے کہا ہے کہ اسرائیل کا فلسطینیوں کو جبری بےدخل کرنا عالمی قوانین کی خلاف ورزی ہے،جسے روکنے کے لیے اقدامات اٹھائے جائیں گے۔
تفصیلات کے مطابق گذشتہ روز اقوام متحدہ کی ریلیف اینڈ ورکس ایجنسی کے نمائندوں کی جانب سے مقبوضہ بیت المقدس کے علاقے الشیخ جرح میں صہیونی فوج کے طاقت کے زور پر بے دخل کیے گئے فلسطینیوں کے لیے قائم عارضی کیمپوںکا دورہ کیا گیا، جہاں فلسطینیوں نے انہیں اسرائیلی مظالم سے آگاہ کیا۔
اقوام متحدہ کے نمائندوں کی جانب سےفلسطینی پناہ گزینوں کو ہر ممکن تعاون اور مدد کی یقین دہانی کراتے ہوئے ٹیم کے ارکان نےکہا کہ ان کے گھروں کو واپسی کے لیے اقوام متحدہ کی جانب سےاقدامات اُٹھائے جائیں گے اور اس حوالے سے عالمی قوتوں سے بھی نتیجہ خیز بات کی جائے گی۔
خیال رہے کہ قابض صہیونی فوج نے ماہ رمضان میں شیخ جرح سے فلسطینوں کو طاقت کے زور پر بےدخل کردیا تھا جس کے باعث شروع ہونے والی جھڑپوں نے اسرائیل اور حماس کے درمیان جنگ کی صورت اختیار کرلی تھی جس میں 250 سے فلسطینی شہید ار درجنوں عمارتیں تباہ ہوگئی تھیں۔