(روز نامہ قدس ۔آنلائن خبر رساں ادارہ ) طیب اردوان نے کہا کہ جنرل اسمبلی کے اجلاس میں فلسطین کا مقدمہ بہترین انداز میں پیش کرنے پر ترک وزیر خارجہ اور دیگر اسلامی ممالک کے وزرائے خارجہ قابل تحسین ہیں۔
ترک ذرائع ابلاغ کے مطابق گزشتہ روزترکی صدر رجب طیب اردوان کی جانب سے جاری کردہ بیان میں اسرائیلی جارحیت کی سختی سے مذمت کرتے ہوئے کہا گیا ہے کہ دنیا کو بار بار یہ باور کراتا رہوں گا کہ اسرائیل ایک دہشت گرد ریاست ہے۔
صداردوان نے کہا ہے کہ ترکی دنیا کو فلسطین کا نقشہ دکھاتا رہے گا کہ اسرائیل نے اپنے قیام سے اب تک کیسے فلسطینیوں کی زمینیں ہڑپ کیں اور فلسطینیوں پر مظالم ڈھائے ہیں۔
ان کا کہنا تھا کہ ترکی کے سینئر سفارت کار اور اقوام متحدہ کی جنرل اسمبلی کے موجودہ صدر وولکان بوزکیر کی سربراہی میں فلسطین کے معاملے پر کامیاب اجلاس ہوا جبکہ اجلاس میں فلسطین کا مقدمہ بہترین انداز میں پیش کرنے پر ترک وزیر خارجہ میلوت چاوش اولو اور دیگر اسلامی ممالک کے وزرائے خارجہ بھی قابل تحسین ہیں ۔
واضح رہے کہ فلسطین اور اسرائیل کے درمیان جنگ بندی کا معاہدہ جمعرات اور جمعہ کی درمیانی شب طے پایا۔11 روزہ جنگ میں 232 فلسطینی شہید ہوئے جن میں 65 معصوم بچے۔39 خواتین اور 15 بزرگ شہری شامل ہیں۔