(روز نامہ قدس ۔آنلائن خبر رساں ادارہ ) قابض صیہونی آبادکاروں نے مقبوضہ بیت المقدس کے شہر نابلس کے جنوبی علاقے بورین میں فلسطینیوں کی وسیع علاقے پر پھیلی ہوئی کھڑی فصلوں کو نذر آتش کردیا اور فلسطینی گھروں پر حملہ کرکے املاک سمیت کھڑکیاں اور دروازے توڑ ڈالے۔
مقبوضہ فلسطین میں غیر قانونی صیہونی آبادکاروں کے جرائم اور صیہونی ریاست کی غیر قانونی سرگرمیوں پر نظررکھنے والے ادارے کے سربراہ غسان دغلس نے فلسطینی نشریاتی ادارے "وفا ” سے بات کرتے ہوئے بتایاہے کہ فلسطینیوں کو علاقے سے بے دخل کرنے کیلئے غیر قانونی صیہونی آبادکاروں کی جانب سے انتقامی حربوں کا کھلے عام استعمال کیا جارہا ہے، انھوں نے بتایا کہ مسلح غیر قانونی صیہونی آبادکارسڑک پر فلسطینی رجسٹریشن والی گاڑیوں کو نشانہ بناتے ہیں، بورین قصبہ متعدد بارصیہونی آبادکاروں کے حملے کا نشانہ بن چکا ہے جس میں زیتون کے درختوں کو مکمل طور پر کاٹنا، کھیتوں اور فصلوں کو آگ لگانا، زیتون کی فصل چوری کرنا، زیتون کی کٹائی کرنے والے فلسطینی رضاکاروں پر حملہ کرنا، اور پیٹرول بموں کو فلسطینیوں کے مکانات کی طرف پھینکنا شامل ہیں۔