(روز نامہ قدس ۔آنلائن خبر رساں ادارہ ) صیہونی فوجیوں نے فلسطین پر غیرقانونی قبضے کے خلاف احتجاج کرنے والے فلسطینی باشندے کو گولیاں مار کرشہید کردیا۔
مقامی ذرائع کے مطابق قابض صیہونی فوجیوں نے گذشتہ روز مقبوضہ فلسطین کے مغربی کنارے کے شمالی شہر "نابلس” میں بیت دجن کے مقام پر مسجد موسیٰبن نصیر کے 45 سالہ پیش امام الشیخ عاطف یوسف حنایشہ کو اس وقت گولیاں مارکرشہید کردیا جب وہ فلسطین پر اسرائیلی قبضے اور قابض صیہونی فوجیوں کی جانب سے نہتے فلسطینیوں پر مظالم کے خلاف ایک احتجاجی مظاہرے میں شریک تھے۔
مقامی ذرائع کا کہنا ہے کہ صیہونی فوجیوں نے مظاہرین پر طاقت کا بے دریغ استعمال کیا جس کے نیتے میں درجنوں فلسطینی زخمی ہوئے جنہیں قریبی اسپتال منتقل کیا گیا تاہم امام مسجد الشیخ عاطف یوسف حنایشہ کو شدید زخمی حالت میں اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گئے۔
اسرائیلی فوج نے ایک فلسطینی شہری کو گولیاں مار کر شہید کرنے کا اعتراف کیا ہے اورکہا ہے کہ فلسطینی شہری کو گولی اس وقت ماری گئی جب وہ اسرائیل مخالف ایک ریلی میں شریک تھا۔مقامی فلسطینی ذرائع کے مطابق اسرائیلی فوج کی ریاستی دہشت گردی کے نتیجے میں متعدد فلسطینی زخمی بھی ہوئے