(روز نامہ قدس ۔آنلائن خبر رساں ادارہ ) مقبوضہ فلسطین میں چھ سال بعد ہونے والی برفباری نے گھروں اور سڑکوں کو سفید چادر سے ڈھک دیا، معمولات زندگی متاثر، کورونا وائرس کے خلاف ہونے والی ویکسینیشن بھی متاثر۔
جمعرات کے روز سے شروع ہونے والی بارشوں اور برفباری نے مقبوضہ فلسطین میں ہر طرف سفید چارد بچھادی ہے مقبوضہ فلسطین میں برف باری اور موسلا دھار بارش سے سردی کی شدت میں اضافہ ہوگیا ہے، بیت المقدس میں برف باری نے مسجد اقصیٰ کو بھی سفید چادر میں لپیٹ لیا، مسجد کے صحن اور گنبد برف ڈھک گئے۔
مقبوضہ فلسطین کے بعض مقامات پر 30 سینٹی میٹر تک برف پڑی جبکہ علاقوں میں موسلادھار بارش کا سلسلہ جاری ہے۔
دوسری جانب مقبوضہ فلسطین کے محصور شہر غزہ میں بھی موسلادھار بارش کے ساتھ اولے پڑے، فلسطین محکمہ موسمیات کے مطابق جمعرات سے رات بھر ہونے والی تیز بارش نے سردی کی شدت میں اضافہ کردیا ہے جبکہ بارش کے باعث مختلف حادثات میں 6 افراد کے زخمی ہونے کی اطلاعات ہیں۔