ایک فلسطینی مزاحمت کار اس وقت شدید زخمی ہوا جب قابض اسرائیلی فورسز نے خان یونس کے مضافات میں مجاہدین کے ایک گروپ پر فائرنگ کی۔ ایمبولنس سروسز کے ڈائریکٹر ڈاکٹر معاویہ حسنین نے اس بارے میں معلومات دیتے ہوئے کہا کہ اسرائیلی فورسز نے خان یونس کے مضافات میں ابسان گاوں میں ٹینکوں کے ذریعے مجاہدین کے ایک گروپ پر گولہ باری کی جس کے نتیجے میں ایک مزاحمت کار زخمی ہوا ،جسے فوری طور پر ناصر گورنمنٹ ہسپتال میں داخل کرا دیا گیا۔ اسرائیلی فوج نے خان یونس گاوں کی طرف تین گولے داغنے کی تصدیق کر دی ہے۔ قابض اسرئیلی فورسز جمعرات کی صبح ، رفح کے مشرق میں ،زرعی زمینوں میں بلڈوزروں سمیت داخل ہوئے اور زمین کے ایک وسیع رقبے کو بلڈوز کر دیا۔ اسرائیلی ریڈیو کے مطابق قابض اسرائیلی فورسز نے مغربی کنارے میں جمعرات طلوع فجر کے موقع پر چھاپے مار کر 11فلسطینی شہریوں کو گرفتار کر کے نامعلوم مقامات پر پہنچا دیا ہے۔ مقامی ذرائع کے مطابق قلقلیہ ،الخلیل ،بیت لحم اور جنین میں یہ گرفتاریاں عمل میں لائی گئی ہیں۔ قابض فورسز نے جمعرات کو ہی نابلس میں مازان الدنبک نامی نوجوان کو پھر گرفتار کیا،انہیں 8سال حراست میں رکھنے کے بعد صرف ایک ماہ پہلے رہا کیا گیا تھا۔ اسی دوران صہیونی آبادکاروں نے جنین ضلع کے بارتا گاوں میں فلسطینیوں کے دسیوں زیتون اور بادام کے درختوں کو آگ کی نذر کر دیا۔