گذشتہ روز ترکی میں ہونے والے ایشیائی ممالک کے اجلاس میں گذشتہ ہفتے غزہ کی معاشی ناکہ بندی توڑنے کے لیے آنے والے امدادی بحری بیڑے پر اسرائیلی حملے کی شدید مذمت کرتے ہوئے اسے انسانی حقوق کی سنگین خلاف ورزی اور جنگی جرم قرار دیا ہے۔ واضح رہے امدادی بحری بیڑے”فریڈیم فلوٹیلا” پر اسرائیلی فوج کی جارحیت میں نو ترک رضاکاروں سمیت کم ازکم 20 افراد شہید اور پچاس سے زائد زخمی ہو گئے تھے۔ ترک صدر عبداللہ گل کی زیر صدارت ایشیائی ممالک کے اجلاس سے خطاب کرتے ہوئے ترک صدر نے کہا کہ اسرائیل امدادی بیڑے پر حملہ کر کے دنیا میں تنہا ہو گیا ہے اور ترکی کے خلاف پروپیگنڈہ کر کے خود کو مزید تنہائی میں ڈال رہا ہے۔ انہوں نے کہا کہ اسرائیل کو امدادی جہاز پر حملے کے نتائج کو بھگتنا پڑے گا۔ اجلاس کے تمام شرکاء نے اپنی تقاریر میں صہیونی حکومت کی طرف سے غزہ کی معاشی ناکہ بندی اور امدادی جازوں پر حملوں کی شدید مذمت کی۔ مقررین اسرائیل پر پابندیاں عائد کرنے اورجنگی جرائم کے ارتکاب پر صہیومی قیادت کے ٹرائل کا مطالبہ کیا۔