(روزنامہ قدس ۔آن لائن خبر رساں ادارہ) دنیا بھر کے 1.2 ارب مسلمانوں کے مفادات کے تحفظ کیلئے کام کر نے والی تنظیم تعاون اسلامی نے عالمی برادری سے مطالبہ کیا کہ وہ فلسطین میں پیدا ہونے والی موجودہ صورتحال کے پیش نظر فلسطینیوں کی حمایت میں آواز بلند کرے۔
تنظیم تعاون اسلامی کی انسانی حقوق کی کمیٹی کی جانب سےقابض ریاست میں غزہ کی پٹی میں مظلوم فلسطینیوں کے گھروں کی مسماری، غزہ کے محاصرے اور اسی طرح مظلوم فلسطینی عوام کو بنیادی انسانی حقوق سے محروم کرنےسے متعلق اسرائیل کی جاری پالیسیوں پر تشویش کا اظہار کرتے ہوئے ایک بیان جاری کیا ہے جس کے مطابق مظلوم فلسطینیوں پرجاری صیہونی جارحیت پر عالمی برادری کی خاموشی کوبہت بڑا جرم قرار دیا ہے۔
کمیٹی نے اپنے بیان میں غاصب صیہونی دہشتگردوں کی جانب سے فلسطینیوں کی گرفتاری اور انہیں اجتماعی سزادینے کو عالمی قوانین کی خلاف ورزی قراردیتے ہوئے عالمی برادری سے مطالبہ کیا ہے کہ وہ فلسطین میں پیدا ہونے والی موجودہ صورتحال کے پیش نظر فلسطینیوں کی حمایت میں آواز بلند کرے۔