(روزنامہ قدس ۔آن لائن خبر رساں ادارہ ) رواں سال صہیونی فوج نے فلسطینیوں کے 28 گھر مسمار کئے ہیں جبکہ گزشتہ ایک سال کے دوران 150 سے زائد فلسطینیوں کے گھروں کو جبری مسمار کرکے خواتین اور بچوں سمیت ہزاروں فلسطینیوں کو بے گھر کردیا ہے۔
فلسطینی نیوز ویب سائٹ قدس پریس کے مطابق صہیونی فوج نے مقبوضہ بیت المقدس کے شہر ال لُدمیں ایک فلسطینی خاندان کا مکان مسمار کر دیا جس کے نتیجے میں گھر میں موجود خواتین اور بچوں سمیت تمام افراد کھلے آسمان تلے آگئے۔
عینی شاہدین نے قدس پریس کو بتایا کہ اسرائیلی پولیس اور اسپیشل فورس کے اہلکاروں کی بھاری نفری نے ایک فلسطینی شہری کے مکان کا محاصرہ کرنے کے بعد اسے بلڈوزر کی مدد سےمسمار کردیا۔
گھر کے مالک نعیم عبدالھادی نے بتایا کہ قابض پولیس نے کسی پیشگی نوٹس کے بغیر ان کے گھر پردھاوا بولا اور دروازے توڑ کراندر داخل ہوگئے۔ گھر میں موجود تمام خواتین اور بچوں کو بندوق کی نوک پر باہر نکالا اور اس کے بعد بلڈوزر کی مدد سے مکان کو مسمار کردیا۔