(روزنامہ قدس ۔آن لائن خبر رساں ادارہ) غزہ کے غریب اور مستحق شہریوں کے لیے قطر کی جانب سے نقد امداد ی رقوم کی تقسیم بنکوں اور ڈاک خانوں سے کے ذریعے شروع کردی گئی ہیں۔
فلسطین میں خلیجی ریاست قطر کے سفیر اور غزہ میں تعمیراتی کمیٹی کے سربراہ محمد العمادی نے گزشتہ روز غزہ کا دوراہ کیا اور اسلامی تحریک مزاحمت’حماس’ کی قیادت سے ملاقات کی، انہوں نے بتایا کہ اس ماہ قطر کی طرف سے غزہ کے ایک لاکھ 20 ہزار خاندانوں میں فی کنبہ ایک سو ڈالر نقد امداد تقسیم کی جائے گی جو آئندہ اتوار تک جاری رہے گی ۔ ۔
قطری سفیر کا کہنا تھا کہ دوحا کی طرف سے غزہ کی پٹی کے محصورین کی مالی مدد کا مقصد غزہ کے عوام کی بہبود اور مالی بحران میں ان کی مدد کرنا ہے۔خیال رہے کہ قطر نے اقوام متحدہ اور مصرکی کوششوں سے غزہ کی پٹی میں شہریوں کے معاشی استحکام کے لیے امداد کی فراہمی کا اعلان کیا تھا۔ اس ضمن میں قطر نے غزہ کے غریب اور مستحق شہریوں میں چھ کروڑ ڈالر کی امداد فراہم کرنے کا اعلان کیا تھا۔