(روزنامہ قدس ۔آن لائن خبر رساں ادارہ) لبنانی وزیرصحت نے کورونا وائرس کی وباء میں فلسطینی پناہ گزینوں کو طبی اور معاشی امداد کی فراہمی میں ناکامی پر عالمی اداروں پر سخت تنقید کی ہے۔
المنار ٹی وی چینل کو دیے گئے ایک انٹرویو میں لبنانی وزیر صحت حمد حسن نے فلسطینی پناہ گزینوں کی معاشی اور طبی امداد میں مجرمانہ غفلت پر تنقید کرتے ہوئے کہا ہے کہ عالمی ادارے فلسطینی پناہ گزینوں کے حوالے اپنی ذمہ داریاں پوری نہیں کررہے ہیں ، انھوں نے کہا کہ شامی اور فلسطینی پناہ گزینوں کو عالمی وباء کے دوران طبی امداد کے ساتھ ساتھ معاشی مدد کی بھی ضرورت ہے اور عالمی ادارے اس حوالے سے آنکھیں بند کیےبیٹھے ہیں۔
انھوں نے بتایا کہ کورونا وائرس کی وباء کے دوران لبنانی حکومت تمام پناہ گزینوں کے ساتھ مساوی سلوک کررہی ہے پناہ گزینوں کو وہ سہولیات فراہم کی جا رہی ہیں جوعام لبنانی شہریوں کو دی گئی ہیں۔انہوں نے مزید کہا کہ عالمی ادارے فلسطینی پناہ گزینوں کے حوالے سے اپنی ذمہ داریوں سے فرار نہیں اختیار کرسکتے۔