غزہ کے عالمی سمندرمیں محصور غزہ کے لیے امداد لے جانے والے بحری بیڑے پراسرائیلی فوج کے حملے کے بعد ترکی نے صورت حال پرقابو پانے کے لیے ہنگامی اجلاس طلب کرکے صورت حال کا جائزہ لیا ہے۔ ترکی سے سرکاری ذرائع کے مطابق آج صبح قافلے کے جہازوں پر اسرائیلی فوج کے حملے کے فوری بعد ترک صدر عبداللہ گل نے وزیراعظم رجب طیب اردوان، وزیرخارجہ احمد داؤود اوگلو اور دیگر حکومتی شخصیات کو طلب کیا اور اسرائیلی جارحیت کے بعد کی صورت حال کاجائزہ لیا گیا۔ ذرائع کے مطابق اجلاس میں امدادی قافلے کو تحفظ فراہم کرنے کے لیے عالمی سطح پر کوششیں کرنے پر زوردیا گیا ہے. اس سلسلے میں وزارت خارجہ میں اسرائیلی سفیر کو طلب کر کے شدید احتجاج بھی کیا گیا ہے اور اسرائیل سےمطالبہ کیا ہے کہ اسرائیل امدادی قافلے کی راہ نہ روکے۔ ادھراستنبول میں قائم اسرائیلی سفارت خانے کے باہر ہزاروں افراد نے جہازوں پر صہیونی جارحیت کے خلاف احتجاجی مظاہرہ اور دھرنا دیا ہے۔ مظاہرین نے سفارت خانے کی طرف بڑھ کر اس پر پھتراؤ کی بھی کوشش کی تاہم پولیس اور قانون نافذ کرنے والے اداروں کے اہلکاروں نے مظاہرین کو آگے بڑھنے سے روک دیا۔