(روزنامہ قدس ۔آن لائن خبر رساں ادارہ) امریکی نام نہاد منصوبے کے خلاف مقبوضہ فلسطین کے مختلف علاقوں میں پرتشدد احتجاجی مظاہرے جاری ،تین دن میں صیہونی فوج نے فائرنگ کرکے دو بچوں اور ایک فلسطینی پولیس اہلکار سمیت 4 فلسطینیوں کو شہید کردیا ۔
وزارت صحت کے مطابق مقبوضہ فلسطین کی مذہبی اور سیاسی جماعتوں کی اپیل پر کل جمعہ کے روز امریکا کے مشرق وسطیٰ کے امن کیلئے پیش کردہ نام نہاد امن منصوبے ‘صدی کی ڈیل’ کے خلاف یوم الغضب منایاگیا غرب اردن، القدس اور غزہ کی پٹی میں بڑے بڑے جلوس نکالے گئے جس میں لاکھوں فلسطینیوں نے شرکت کی، اسرائیلی فوج کی ریاستی دہشتگردی میں ایک اور فلسطینی نوجوان شہیدمتعدد زخمی جبکہ دسیوں کوگرفتار کرلیا گیا۔
فلسطینی مظاہرین کو کچلنے کے لیے اسرائیلی فوج نے طاقت کا وحشیانہ استعمال کیا جس کے نتیجے میں ایک فلسطینی شہید اور درجنوں زخمی ہوئے ہیں، گزشتہ تین دنوں کے دوران دو بچوں اور ایک فلسطینی پولیس اہلکار سمیت چار فلسطینیوں کو صیہونی فوج نے شہیدکیا ہے ۔
گزشتہ روز شمالی طولکرم میں قفین کے مقام پر اسرائیلی فوج نے ایک احتجاجی جلوس پرفائرنگ کی جس کے نتیجے میں 19 سالہ بدر نافلہ شہید ہوگیا۔مقامی ذرائع نے بتایا کہ نافلہ کو شدید زخمی حالت میں اسپتال منتقل کیا گیا مگر گردن میں گولی لگنے اور شہ رگ کٹ جانے کے نتیجے میں وہ اسپتال میں دم توڑ گیا۔ادھر فلسطین میں انسانی امدادی امور کے لیے کام کرنے والے ادارے’ہلال احمر’ کے مطابق غرب اردن میں اسرائیلی فوج کی فائرنگ سے 40 فلسطینی زخمی ہوئے ہیں۔ ان میں سے بیشتر کو آنسوگیس کے شیل، ربڑ کی گولیاں اور براہ راست کی گئی فائرنگ سے گولیاں لگی تھیں۔ اسرائیلی فوج کی اشک آور گیس کی شیلنگ سے 32 فلسطینی دم گھٹنے سے بے ہوش ہوئے۔ فلسطینی مظاہرین کے خلاف کریک ڈائون میں متعدد فلسطینی شہریوں کو حراست میں لے لیا گیاہے۔