(روزنامہ قدس ۔آن لائن خبر رساں ادارہ) ترک سیاستدان کا کہنا ہے کہ امریکی صدر اپنے اس خطرناک منصوبے صدی کی ڈیل کے مضمرات سے بے خبر ہیں،اس سازشی امن منصوبے کے نتیجے میں پورے مشرق وسطیٰ میں تشدد کی نئی آگ بھڑک سکتی ہے۔
ترکی کی حکمراں جماعت ‘انصاف وترقی’ (آق) کے نائب صدر حیاتی یازیگی نے امریکی صدر ڈونلڈ ٹرمپ کی جانب سے مشرق وسطیٰ کے لیے نام نہاد امن منصوبے صدی کی ڈیل پر عالمی رد عمل دیتے ہوئے کہا ہے کہ صدی کی ڈیل کی سازش کا مقصد امن قائم کرنا نہیں بلکہ فلسطین پر صیہونی ریاست کو مکمل اختیارات دینا ہے اور مسلمانوں کو بیت المقدس سے بے دخل کرنا ہے ۔
انھوں نے امریکی صدر پر تنقید کرتے ہوئے کہا کہ صدر ٹرمپ اپنے مزعومہ منصوبے کی آڑ میں خطے میں انتشار پھیلانا چاہتے ہیں، امریکا کا سازشی نام نہاد امن منصوبے کے نتیجے میں پورے مشرق وسطیٰ میں تشدد کی نئی آگ بھڑک سکتی ہے امریکی صدر اس خطرناک منصوبے کے مضمرات سے بے خبر ہیں۔
اس منصوبے کے ذریعے مسئلہ فلسطین کو ختم کرنے کی چال چلی گئی ہےتاہم سب کو یاد رکھنا چاہئے کہ بیت المقدس ہی فلسطین کا ابدی دارالحکومت ہے ، القدس کو فلسطینی قوم سے سلب کرنے والوں کے مکروہ عزائم پوری طرح ناکام ہوں گی۔