(روزنامہ قدس ۔آن لائن خبر رساں ادارہ) فلسطینی اتھارٹی کے وزراء کے صیہونی ریاست کے حکام سے تعلقات اور میل ملاپ ظاہر کرتے ہیں کے فلسطین اتھارٹی صیہونی حکام کے خلاف عدم اتحاد کا شکار ہیں۔
فلسطین پر قابض صہونی ریاست کے خلاف برسرپیکار اسلامی تحریک مزاحمت ‘حماس’ کے ترجمان حازم قاسم نے کہا ہے کہ حالات یہ ثابت کررہے ہیں کہ فلسطینی اتھارٹی میں صہیونی دشمن کا مقابلہ کرنے اور اس کے جرائم کی روک تھام کے لیے عزم کا فقدان ہے، فلسطینی اتھارٹی کے وزیر برائے سول امور حسین الشیخ کی اسرائیلی وزیرخزانہ موشے کحلون سے ملاقات اس بات کا ثبوت ہے کہ اسرائیلی ریاست کے ساتھ طے پائے تمام معاہدوں ختم کرنے کا اعلان محض ڈھکوسلا اور کاغذ پر سیاہی کے مترادف ہے
۔حازم قاسم کا کہنا تھا کہ موشے کحلون کے ساتھ فلسطینی اتھارٹی کے وزیر کی ملاقات رام اللہ اتھارٹی اور اسرائیل کے درمیان رابطوں اور معاہدوں پرعمل درآمد کی واضح مثال ہے۔ اس سے ظاہر ہوتا ہے کہ فلسطینی اتھارٹی اسرائیل کے بائیکاٹ کے دعوئوں پرعمل درآمد کا عزم اور حوصلہ نہیں رکھتی۔حماس کے ترجمان نے رام اللہ اتھارٹی کی طرف سے اسرائیلی فوج کے ساتھ جاری سیکیورٹی تعاون کی مذمت کرتے ہوئے کہا کہ دشمن سے فوجی تعاون قوم کی امنگوں اور توقعات کی توہین ہے۔