(روزنامہ قدس ۔آنلائن خبر رساں ادارہ )قابض صہیونی فوج کے مظالم کے خلاف بر سرپیکار فلسطینی مزاحمتی تنظیم کے وفد نے لبنان میں تعینات ترک سفیر کے ملاقات کی۔ملاقات میں فلسطین کی موجودہ صورتحال،لبنان میں موجود فلسطینی پناہ گزینوں کو درپیش مسائل اور لبنان میں پیش کیے جانے والے متنازعہ قانون کے بارے میں تفصیلی تبادلہ خیال کیا گیا۔
تفصیلات کے مطابق فلسطینی مزاحمتی تنظیم حماس کے لبنان میں مندوب ڈاکٹر احمد عبدالھادی کی قیادت میں حماس کے اعلیٰ سطحی وفد نے ترک سفیر حقان چاکیل سے ان کے دفتر میں ملاقات کی۔ وفد کے دیگر ارکان میں لبنان میں حماس کے سیاسی شعبے کے رکن جہاد طہ، لبنان میں تعلقات عامہ کے انچارج ایمن شناعہ، شعبہ اطلاعات کےانچارج عبدالمجید عوض بھی شامل تھے۔
ملاقات کے دوران حماس کی قیادت نے ترک سفیر سے فلسطین کی موجودہ صورت حال، لبنان میں فلسطینی پناہ گزینوں کے مسائل بالخصوص لبنانی وزیر لیبر کی طرف سے فلسطینی پناہ گزینوں کے خلاف پیش کردہ نئے متنازعہ قانون کے بارے میں تبادلہ خیال کیا۔
بعد ازاں حماس کی طرف سے جاری بیان میں بتایا گیا کہ حماس کے وفد نے غزہ کی پٹی پر اسرائیل کی طرف سے مسلط کی گئی 12 سالہ پابندیوں اور ان کے اثرات، غزہ کی پٹی میں جاری حق واپسی مظاہروں اور انہیں کچلنےکےلیے اسرائیلی فوج کی طرف سے طاقت کے استعمال پر بھی بات چیت کی گئی۔
ملاقا ت کے اختتام پر ترک سفیر نے یقین دلایا کہ ان کا ملک فلسطینی قوم کے دیرینہ حقوق اور مطالبات کی حمایت جاری رکھے گا۔