مقبوضہ بیت المقدس : ( روز نامہ قدس نیوز ) مقبوضہ فلسطین کے باسیوں نے امریکی صدر ڈونالڈ ٹرمپ کو مخاطب کرتے ہوئے کہا ہے کہ فلسطینی عوام امریکہ کو دس بلین ڈالر دینے کو تیار ہیں بدلے میں امریکہ تمام صہیونیوں کو جو دوسرے ممالک سے غاصبانہ قبضے کے تحت فلسطین آبسے ہیں ان کو امریکہ میں ایک صہیونی ریاست بنا دے۔
حالیہ دنوں بحرین میں ہونے والی اقتصادی کانفرنس بعنوان صدی کی ڈیل کے سامنے آنے اور معاشی لالچ کے عوض فلسطینیوں سے فلسطین سے دستبردار ہونے کے امریکی و عربی مطالبہ کے جواب میں فلسطین کے سوشل میڈیا میں ایک میسج شدت سے گردش کر رہا ہے جس میں فلسطینی عوام کا کہنا ہے کہ وہ امریکی صدر کو دس بلین ڈالر دینے کو تیار ہیں اور اس کے عوض امریکہ تمام صہیونیوں کو فلسطین سے نکال کر امریکہ میں آباد کرے اور صہیونیوں کی ریاست اسرائیل کو امریکہ میں قائم کیا جائے ۔
واضح رہے کہ صدی کی ڈیل میں امریکہ اور عرب ممالک کی جانب سے فلسطینیوں پر دباؤ ہے کہ وہ فلسطین سے دستبردار ہو جائیں ۔ تاہم فلسطینی عوام نے امریکی و عربی فارمولہ کو مسترد کر دیا ہے ۔