بیت المقدس(روز نامہ قدس ۔آن لائن خبر رساں ادارہ)مسجد اقصیٰ کے امام اور ممتاز عالم دین الشیخ عکرمہ صبری نے فلسطینی قوم پر زور دیا ہے کہ وہ قبلہ اول میں اپنی زیادہ سے زیادہ موجودگی اور حاضری کو یقینی بنائیں تاکہ ماہ صیام کے دوران یہودی آباد کاروں اور غاصب صہیونیوں کی مجرمانہ سازشوں کو ناکام بنایا جاسکے، امام مسجد کے اس بیان کے ساتھ ہی اسرائیلی فوج کی جانب سے لگائی جانے والی پابندیوں اور رکاوٹوں کے باوجود ایک لاکھ سے زائد فلسطینیوں نے مسجد اقصیٰ میں نماز عشاء اور تراویح ادا کیں
الشیخ عکرمہ صبری کا کہنا تھا کہ فلسطینی ماہ صیام کےآخری عشرے میں قبلہ اول کے لیے رخت سفر باندھ لیں، قبلہ اول کے دفاع کے دیگر ذرائع کے ساتھ فلسطینیوں کی زیادہ سے زیادہ مسجد اقصیٰ میں موجودگی ضروری ہے۔ تاکہ قابض صہیونیوں کے خلاف سازشیں ناکام بنائی جا سکیں۔
جمعرات کو دن بھر فلسطینیوںکی مسجد اقصیٰ آمد کا سلسلہ جاری رہا۔ تیسرے جمعہ کی شب کو ایک لاکھ سے زائد مسلمانوں نے مسجد اقصیٰ میں حاضری دی اور عشاء اور تراویح کی نمازیں بہ جماعت اداکیں۔ہزاروں فلسطینیوں نے مسجد اقصیٰ ہی میں روزہ افطار کیا۔
اسلامی اوقاف انتظامیہ نے نماز عشاء اور تراویح میں مسلمانوں کی زیادہ تعداد کی آمد کے پیش نظر مسجد کے تمام اہم مقامات اورخواتین کے لیے مختص نمازکی جگہوں کو کھول دیا گیا۔