برازیل (روز نامہ قدس ۔آن لائن خبر رساں ادارہ) برازیل کی اپوزیشن اور پارلیمنٹ کے چیئرمین نے مقبوضہ بیت المقدس کو اسرائیل کا دارالحکومت تسلیم کرنے کا حکومتی فیصلہ مسترد کر دیا ہے۔
روز نامہ قدس کو موصول ہونے والی اطلاعات کے مطابق برازیلی اپویشن لیڈر رونڈلوفو روڈریگر نے ایک بیان میں کہا ہے کہ وہ القدس کے حوالے سے فلسطینی موقف کی تائید کرتے ہیں اور سفارت خانے کی تل ابیب سے القدس منتقلی کو تسلیم نہیں کرتے۔
بیت المقدس کے دورے کے دوران ایک بیان میں برازیلی اپوزیشن لیڈر نے صدر جائیر پولسونارو کے القدس کے حوالے سے اقدام کو برازیلی قوم کے ضمیر کی آواز کے خلاف قرار دیا۔
برازیلی اپوزیشن لیڈر کا کہنا تھا کہ ان کا دورہ القدس فلسطینی قوم کے ساتھ یکجہتی کے اظہار کے لیے ہے اور وہ القدس کو اسرائیل کا دارالحکومت تسلیم نہیں کرتے۔
خیال رہے کہ برازیل کے صدر نے حال ہی میں بیت المقدس کے دورے کے دوران تاریخی اسلامی شہر کو اسرائیلی ریاست کا دارالحکومت تسلیم کر لیا تھا جس پر فلسطینی عوامی حلقوں کی طرف سخت احتجاج کیا گیا ہے۔