غزہ (روز نامہ قدس ۔آن لائن خبر رساں ادارہ) غزہ کی پٹی اسرائیلی فوج کی کارروائیوں میں زخمی ہونے والے فلسطینیوں کےعلاج معالجے اور خاندان کی کفالت کے لیے ملنےوالی امدادی رقم بند کیے جانے خلاف زخمیوں نے مسلسل 13 دن سے فلسطینی اتھارٹی کے خلاف بہ طور احتجاج بھوک ہڑتال جاری رکھی ہوئی ہے۔
روز نامہ قدس کو موصول ہونے والی اطلاعات کے مطابق غزہ میں زخمیوں کی نمائندہ کمیٹی کے ترجمان ظریف الغرہ نے کہا کہ 10 فلسطینیوں نے گذشتہ تیرہ روز سے فلسطینی اتھارٹی کی معاشی انتقام کے خلاف بھوک ہڑتال جاری رکھی ہوئی ہے۔
انہوں نے کہا کہ اسرائیلی ریاست کے ساتھ ساتھ فلسطینی اتھارٹی بھی غزہ کے شہریوں سے ان کے منہ سے نوالہ چھیننے کی سازش میں ملوث ہے۔ غزہ کے زخمی فلسطینی اتھارٹی کی انتقامی کارروائیوں کے خلاف سراپا احتجاج ہیں اور انہوں نے اتھارٹی کے خلاف بھوک ہڑتال جاری رکھی ہوئی ہے۔
خیال رہے کہ فلسطینی اتھارٹی نے دو ماہ قبل غزہ کے 1100 زخمیوں، 400 اسیران اور 1668 شہیدوں کے خاندانوں کی کفالت کے لیے دی جانے والی امداد بند کر دی تھی۔