قاہرہ(روز نامہ قدس ۔آن لائن خبر رساں ادارہ) مصر کی وزارت تعلیم نے عرب تاریخ اور جغرافیے کی ایک کتاب میں فلسطین کے نقشے پر اسرائیل کا نام شائع ہونے کی تحقیقات کا اعلان کیا ہے۔
روز نامہ قدس کو موصول ہونے والی اطلاعات کے مطابق مصری وزارت تعلیم کی ترجمان امینہ خیری نے پریس کو جاری ایک بیان میں کہا کہ حکام انٹرمیڈیٹ کے سال اوّل کی کتاب میں فلسطین کے نقشے پر اسرائیل کا نام لکھے جانے کی خبریں سامنے آنے کے بعد اس کی تحقیقات کر رہے ہیں۔
مصری حکومت کے ترجمان سمجھے جانے والے اخبار ’’بوابۃ اخبار الیوم‘‘ نے اپنی رپورٹ میں بتایا کہ حکام کو اس پتا چلا کہ ایک درسی کتاب میں فلسطین کے نقشے پر اسرائیل کا نام درج ہے۔ یہ شکایت پہلے طلباء کی طرف سے سامنے آئی جس کے بعد انتظامیہ نے اس کا نوٹس لیا اور اس کے بارے میں حکام بالا سے رابطہ کیا گیا۔
خیال رہے کہ اسرائیل اور مصر کے درمیان سنہ 1979ء میں کیمپ ڈیوڈ امن معاہدے کے بعد سفارتی اور اقتصادی تعلقات قائم ہیں تاہم دونوں ملکوں کے عوام ایک دوسرے سے بدستور فاصلے پر ہیں۔
مصر میں فوجی ڈکٹیٹر عبدالفتاح السیسی کی جون 2013ء کی بغاوت کے بعد اسرائیل اور مصر کے درمیان قربت میں اضافہ ہوا ہے