غزہ (روز نامہ قدس ۔آن لائن خبر رساں ادارہ) قطر کی جانب سے غزہ کی پٹی کے ملازمین کے لیے دی گئی رقوم حماس کی جانب سے وصول کرنے سے انکار کے بعد وہ رقم غزہ کی پٹی کے غریب خاندانوں میں تقسیم کی گئی ہے۔
روز نامہ قدس کو موصول ہونے والی اطلاعات کے مطابق قطرکی طرف سے دی گئی مالی امداد فی کنبہ 100 ڈالر کے حساب سے تقسیم کی گئی ہے۔
مقامی ذرائع نے بتایا کہ قطرکی طرف سے دی گئی امداد غزہ کے 44 ہزار خاندانوں میں ڈاک کے ذریعے تقسیم کی گئی۔
ذرائع کا کہنا ہے کہ رواں ہفتےغزہ کے مزید 50 ہزار خاندانوں میں امدادی رقم تقسیم کی جائے گی۔ مجموعی طورپر غزہ کے 94 ہزار کنبوں میں یہ رقم تقسیم کی جائے گی۔
فلسطین میں قطر کے سفیر محمد العمادی کا کہنا ہے کہ غزہ کے لیے مقرر کردہ 150 ملین ڈالر کی رقم انسانی بہبود کے منصوبوں اور اقوام متحدہ کے تعاون سے بنیادی ڈھانچے میں صرف کی جائے گی۔