کولالمپور (روز نامہ قدس ۔آن لائن خبر رساں ادارہ) ملائیشیا کے وزیراعظم مہاتیر محمد نے فلسطینی قوم کے دیرینہ حقوق اور آزادی کے لیے جاری مزاحمت کی بھرپور حمایت کے عزم کا اعادہ کیا ہے۔
روز نامہ قدس کو موصول ہونے والی اطلاعات کے مطابق ملائیشیا کے وزیراعظم مہاتیرمحمد نے ٹیلیفون پرحماس کے سیاسی شعبے کے سربراہ اسماعیل ھنیہ کویقین دلایا کہ کولالمپور فلسطینی قوم کی مزاحمت، جدو جہد آزادی اور مسلمہ حقوق کی حمایت جاری رکھے گی۔
مہاتیر محمد نے کہا کہ ان کا ملک اسرائیل کو مجرم ریاست قرار دیتا ہے اور فلسطینیوں کی تحریک آزادی کی بھرپور حمایت کے عزام کا اعادہ کرتا ہے۔
ادھر غزہ میں حماس کے دفتر سے جاری ہونے والے بیان میں کہا گیا ہے کہ ملائیشیا کے وزیراعظم اور حماس کے سیاسی شعبے کے سربراہ اسماعیل ھنیہ کے درمیان ہونے والی ٹیلیفونک بات چیت میں دو طرفہ تعلقات ، حماس اور ملائیشیا کے درمیان تعلقات کو مزید مستحکم کرنے اور قضیہ فلسطین کی تازہ صورت حال پر تبادلہ خیال کیا گیا۔
اسماعیل ھنیہ نے فلسطینیوں کی تحریک آزادی اور مسلمہ حقوق کی حمایت پر ملائیشیا کی حکومت، قوم اور وزیراعظم مہاتیر محمد کے مؤقف کو سراہا۔
اسماعیل ھنیہ کہا کہ ملائیشیا کا کولالمپور میں ہونے والے پیراکی کے بین الاقوامی مقابلے میں اسرائیلی کھلاڑیوں کو شرکت سے روکنے کو جرات مندانہ فیصلہ قراردیتے ہوئے اس اقدام کو سراہا۔
خیال رہے کہ ملائیشیا کی حکومت نے رواں سال جون میں ہونے والے بین الاقوامی پیراکی کے مقابلے میں اسرائیلی کھلاڑیوں کو شرکت کی اجازت دینے سے انکار کردیا ہے۔