غزہ (روز نامہ قدس ۔آن لائن خبر رساں ادارہ) غزہ کی پٹی میں جمعہ کے روز صیہونی فوج کی طرف سے فلسطینی مظاہرین پر کی گئی فائرنگ کے نتیجے میں زخمی ہونے والا 14 سالہ بچہ عبدالرئوف اسماعیل محمد صالحہ اسپتال میں شہید ہو گیا۔
روز نامہ قدس کو موصول ہونے والی اطلاعات کے مطابق غزہ میں وزارت صحت کی طرف سے جاری کردہ بیان میں کہا گیا ہے کہ عبدالرئوف صالحہ جمعہ کے روز مشرقی غزہ کی پٹی میں ہونے والے حق واپسی مظاہرے میں شریک تھا۔اسرائیلی فوج نے فلسطینی مظاہرین کو منشتر کرنے کے لیے گولیاں چلائیں تو کئی گولیاں اس کے جسم میں پیوست ہوگئی تھیں۔
قبل ازین غزہ کی پٹی میں 33 سالہ انور محمد قدیح بھی اسرائیلی فوج کی فائرنگ کے بعد زخموں کی تاب نہ لاتے ہوئے شہید ہو گیا تھا۔
خیال رہے کہ 30 مارچ 2018ء کے بعد سے غزہ میں فلسطینیوں کے پرامن احتجاجی مظاہروں پر صیہونی فوج کے حملوں میں 260 فلسطینی شہید اور 25 ہزار سے زائد زخمی ہوچکے ہیں۔ 500 زخمیوں کی حالت بدستور تشویشناک بیان کی جاتی ہے۔