اسلام آباد (روز نامہ قدس ۔آن لائن خبر رساں ادارہ) پاکستانی وزارت اطلاعات و نشریات نے اپنے بیان میں کہا ہے کہ اسرائیلی شہریوں کے لیے ویزا کی کوئی سہولت جاری نہیں کی جارہی، میڈیا اور پریس میں نشر ہونے والی وہ خبرغلط اور بے بنیاد ہے جس میں اسرائیلی شہریوں کو پاکستانی ہوائی اڈوں پر اترتے ہی ویزا فراہم کرنے کا کہا گیا ہے۔
روز نامہ قدس کو موصول ہونے والی اطلاعات کے مطابق وزارت اطلاعات و نشریات کے ترجمان نے دوٹوک اور واضح انداز میں کہا ہے کہ پاکستان کے اسرائیل سے سفارتی تعلقات نہیں ہیں اسی لیے ویزا سہولیات کا کوئی سوال ہی پیدا نہیں ہوتا۔
واضح رہے کہ گذشتہ چند روز سے پاکستانی میڈیا میں کچھ اس قسم کی خبریں موضوع بحث رہیں کہ پاکستان کی حکومت اسرائیل کے ساتھ تعلقات بحال کر رہی ہے اور اسرائیلی شہریوں کو ایئر پورٹ پر ویزا جاری کیا جائے گا جس کے بعد پاکستان کی سیاسی و مذہبی جماعتوں نے سخت رد عمل دکھایا اس کے بعد اب حکومت کا یہ بیان سامنے آیا ہے۔