کیپ ٹاؤن (روز نامہ قدس ۔آن لائن خبر رساں ادارہ) اسلامی تحریک مزاحمت” حماس” کے پارلیمانی وفد نے جنوبی افریقہ کے دورے کے دوران کیپ ٹاؤن میں جنوبی افریقہ کی حکمران جماعت کی قیادت سے ملاقات کی۔
روز نامہ قدس کو موصول ہونے والی اطلاعات کے مطابق حماس کے وفد نے جماعت کے سیاسی شعبے کے سینیر رکن ڈاکٹر محمود الزھار کی قیادت میں جنوبی افریقہ کی نیشنل پارٹی کے پارلیمانی بلاک کے سربراہ جاکسن ماتھیمبو سے ان کے دفتر میں ملاقات کی۔ اس ملاقات میں فلسطین کی موجودہ صورت حال، صیہونی ریاست کے مظالم، فلسطین میں یہودی توسیع پسندی ، القدس اور غرب اردن کے خلاف صیہونی سازشوں پر تبادلہ خیال کیا گیا۔
حماس کے وفد نے جنوبی افریقہ کی نیشنل پارٹی کی قیادت کوفلسطین کی موجودہ صورت حال پر بریفنگ دی۔
جنوبی افریقہ کی پارلیمانی پارٹی کے سربراہ مسز ماتھیمبو نے حماس کے وفد کا خیر مقدم کیا اور فلسطینی قوم کی حمایت جاری رکھنے پر زورد یا۔ انہوں نے کہا کہ جنوبی افریقہ فلسطینی قوم کے منصفانہ حقوق کی حمایت جاری رکھے گا۔
خیال رہے کہ حماس کے پارلیمانی بلاک ’’اصلاح وتبدیلی‘‘ کا ایک سرکردہ وفد حال ہی میں جنوبی افریقہ کے دورے پر کیپ ٹاؤن پہنچا تھا۔ وفد نے جنوبی افریقہ کی سیاسی قیادت اور حکومتی عہدیداروں سے ملاقات کی۔