موریطانیہ کی وزیر خارجہ الناھا بنت حمدی ولد مکناس نے نواکشوت میں ایک پریس کانفرنس کے دوران کہا: "دنیا جان لے کہ موریطانیہ نے اسرائیل کے ساتھ اپنے سفارتی تعلقات کو مکمل طور پر ختم کر دیا ہے اور اس بارے میں مزید بحث و جدل کا خاتمہ ہو جانا چاہئے”۔ موریطانیہ کی حزب اختلاف کے سربراہ مسعود ولد بلخیر نے حکومت پر الزام لگایا تھا کہ اس نے اب تک دشمن ملک اسرائیل کے ساتھ سفارتی تعلقات استوار کر رکھے ہیں۔
یاد رہے کہ موریطانیہ نے جنوری 2009 میں غزہ پر اسرائیلی جارحیت کے اعتراض کے طور پر اسرائیل کے ساتھ اپنے سفارتی تعلقات کو عارضی طور پر ختم کر دیا تھا۔ غزہ پر اسرائیلی حملے کے نتیجے میں 1400 عام شہری شہید ہو گئے تھے۔ موریطانیہ میں اسرائیل کا سفارتخانہ بند ہو گیا اور اسکے تمام ڈپلومیٹس وہاں سے نکل گئے تھے۔