(فلسطین نیوز۔مرکز اطلاعات) اسلامی تحریک مزاحمت ’’حماس‘‘ نے خبردار کیا ہے کہ اسرائیلی حکومت اور نام نہاد سیکیورٹی اداروں کی سرپرستی میں مسجد اقصیٰ پر یہودی آباد کاروں کے روز مرہ کی بنیاد پر جاری دھاووں کے سنگین نتائج برآمد ہوسکتےہیں۔
رپورٹ کے مطابق حماس کے سیاسی شعبے کے سینیر رکن اور جماعت کے ترجمان عزت الرشق نے کہا ہے کہ یہودی آباد کار اسرائیلی حکومت کی منشاء اور مرضی کے تحت قبلہ اوّل میں داخل ہوکر اشتعال انگیزی پھیلانے اور مسلمانوں کے تیسرے مقدس ترین مقام کی کھلے عام بے حرمتی کے مرتکب ہو رہے ہیں۔عزت الرشق نے کہا کہ فلسطینی اور حماس یہودیوں کی مذہبی اشتعال انگیزی اور مسجد اقصیٰ کی بے حرمتی پرخاموش تماشائی نہیں رہیں گے۔ انہوں نے ’’ہیکل گروپ‘‘ کی جانب سے یہودیوں کو قبلہ اوّل میں لانے اور مقدس مقام کی بےحرمتی کرنے کی مہمات کی شدید مذمت کی اور اسے اسرائیلی حکومت کی باقاعدہ پالیسی کا حصہ قرار دیا۔
ان کا کہنا تھا کہ قبلہ اوّل فلسطینی قوم کے لیے سرخ لکیر ہے جسے کسی صورت میں پامال نہیں کیا جاسکتا ہے۔ اسرائیل قبلہ اوّل کو زمانی اور مکانی اعتبار سے تقسیم کرنے کی گھناؤنی سازشوں کا مرتکب ہے مگر دشمن کو اس میں منہ کی کھانی پڑے گی۔
حماس رہنما نے فلسطینی عوام سے اپیل کی کہ وہ قبلہ اوّل کے دفاع اور یہودی شرپسندوں کی یلغار روکنے کے لیے مسجد اقصیٰ کے لیے رخت سفر باندھ لیں اور دشمن کی جانب سے قبلہ اوّل کو تقسیم کرنے کی سازشوں کو ناکام بنائیں۔ عزت الرشق کا کہنا تھا کہ فلسطینی عوام قبلہ اوّل میں اعتکاف کرنا شروع کردیں تو دشمن کو وہاں آنے اور مذہبی اشتعال انگیزی پھیلانے کا موقع نہیں ملے گا۔