(فلسطین نیوز۔مرکز اطلاعات) اسرائیلی فوج فلسطینی مزاحمت کاروں کی جانب سے اپنے دفاع کے لیے کھودی گئی سرنگوں کی تلاش میں غزہ کی پٹی میں داخل ہوگئی اور بلڈوزورں کی مدد سے کئی مقامات پر کھدائی کرکے سرنگوں کی تلاش کی ناکام کوشش بھی کی گئی۔
رپورٹ کے مطابق منگل کے روز اسرائیل کے D9 نامی بلڈوزر وسطی غزہ کی پٹی میں البریج پناہ گزین کیمپ کے قریب سے اندر داخل ہوئے اور فلسطینی شہریوں کی اراضی میں سرنگوں کی تلاش کے لیے کھدائی کی گئی۔مقامی فلسطینی شہریوں نے بتایا کہ غزہ میں دراندازی کرنے والی اسرائیلی فوج نہ صرف بلڈوزروں کے ہمراہ غزہ میں داخل ہوئی بلکہ بڑی تعداد میں فوجی ٹینکوں اور بکتر بند گاڑیوں کے ذریعے بھی غزہ میں داخل ہوئے۔ اس موقع پر اسرائیلی فوج کو فول پروف سیکیورٹی بھی مہیا کی گئی تھی۔
خیال رہے کہ اگست سنہ 2014 ء کو فلسطینی مزاحمت کاروں اور اسرائیل کے درمیان طے پائے جنگ بندی معاہدے کے باوجود اسرائیلی فوج آئے روز غزہ کی پٹی میں داخل ہو جاتی ہے۔ فلسطینی تنظیموں کی جانب سے احتجاج کے علی الرغم صہیونی فوج کی غیرقانونی دراندازی کا سلسلہ جاری ہے۔