اسرائیلی اخبار نے اپنی رپورٹ میں انکشاف کیا ہے کہ ’’اھافا‘‘ اور ’’سوڈا اسٹریم‘‘ نامی دو مزید کمپنیوں نے عالمی بائیکاٹ کے اثرات کےنتیجے غرب اردن سے اپنے کاخارنے دوسرے مقامات پر منتقل کردیے ہیں۔
اخباری رپورٹ میں دعویٰ کیا گیا ہے کہ آج سے 20 برس پیشترغرب اردن میں جو کارخانے قائم کیے گئے تھے،بائیکاٹ تحریک کے نتیجے میں انہیں اپنے بوریا بسترگول کرنے پڑے ہیں۔ بیس سال پہلے قائم کردہ کارخانوں میں سے 30 فی صد کمپنیوں کے مراکز اور کارخانے اب غرب اردن میں موجود نہیں ہیں۔ یا تو وہ بالکل ختم کردیے گئے ہیں یا انہیں مقبوضہ فلسطین کے سنہ 1948 ء کے مقبوضہ علاقوں میں منتقل کردیا گیا ہے۔
اخباری رپورٹ میں کہا گیا ہے کہ یہودی کمپنیوں نے اپنے تجارتی اور صنعتی مراکز سنہ 2000 ء میں اس وقت گرین لائن کی دوسری طرف منتقل کرنا شروع کیے تھے جب فلسطین میں اسرائیل کے خلاف تحریک انتفاضہ الاقصیٰ شروع ہوئی تھی۔ اس تحریک نے غرب اردن اور بیت المقدس میں اسرائیلی مفادات کو غیرمعمولی نقصان پہنچایا اور یہودی تجارتی کمپنیوں کو اپنے مراکز دوسرے مقامات پر منتقل کرنا پڑے تھے۔ یہ سلسلہ آج بھی جاری ہے۔ عالمی سطح پر جاری بائیکاٹ کی تحریک نے یہودی کارخانوں کی منتقلی میں مزید شدت پیدا کردی ہے۔
اسرائیل کے ایک دوسرے عبرانی اخبار’’یدیعوت احرونوت‘‘ نے اپنی رپورٹ میں بتایا ہے کہ مغربی کنارے میں کاسمیٹک مصنوعات تیار کرنے والی ایک بڑی کمپنی نے اپنے تمام کارخانے غرب اردن سے فلسطین کے سنہ 1948 ء کے علاقوں میں منتقل کرنا شروع کردیے ہیں۔
رپورٹ کے مطابق کاسمیٹک کمپنی’’اھافاہ‘‘ نےمغربی کنارے میں ’’متسبیہ شالوم‘‘ کالونی سے اپنے کارخانے اور مشینری اندرون فلسطین کے سنہ 1948 ء کے ’’عین جدی‘‘ نامی علاقے میں منتقل کرنا شروع کردیے ہیں۔
اسرائیلی اخبار نے اپنی رپورٹ میں لکھا ہے کہ جب سے یورپی منڈیوں میں اسرائیل کی مصنوعات پر متنازع کا ٹیگ لگنا شروع ہوا ہے صہیونی مصنوعات کی خریداری ختم ہو کر رہ گئی ہے جس کے نتیجے میں غرب اردن میں قائم یہودی کمپنیوں کو اپنے کارخانے اندرون فلسطین منتقل کرنا پڑے ہیں۔
رپورٹ کے مطابق برطانیہ سمیت بعض یورپی ملکوں میں اسرائیلی کارخانوں کو وہاں جاری بائیکاٹ تحریک کے نتیجے میں بند بھی ہونا پڑا ہے۔
خیال رہے کہ B.D S کے نام سے اسرائیلی مصنوعات کے بائیکاٹ کی تحریک گذشتہ کئی ماہ سے یورپ سمیت کئی دوسرے ملکوں میں جاری ہے۔ اس تحریک کے خاطر خواہ نتائج سامنے آئے ہیں۔