رپورٹ کے مطابق قاہرہ میں ’’غیرملکی نامہ نگاروں کی نمائندہ‘‘ یونین کی جانب سے جاری کردہ ایک اعلان میں بتایا گیا ہے کہ صحافیوں کا ایک گروپ ’دوستی ٹور‘ پر 9 فروری کو بیت المقدس جائے گا ۔اس گروپ میں غیرملکی نامہ نگاروں کے علاوہ کئی سرکردہ مصری صحافی بھی شامل ہوں گے۔
بیان میں بتایا گیا ہے کہ نوفروری کو شروع ہونے والے دورے کے لیے تیاریاں مکمل کرلی گئی ہیں۔ صحافیوں کا گرو پ دریائے اردن پر بنے شاہ حسین پل کے راستے بیت المقدس داخل ہوگیا جہاں وہ فلسطین کے دوسرے علاقوں کا بھی دورہ کرے گا۔
مصرمیں غیرملکی صحافیوں کے گروپ کے انچارج اور جرمن اخبار’یر اسپیگل‘ کے نامہ نگار فولکھارڈ فینڈفور نے بتایا کہ ان کی قیادت میں مصری اور غیرملکی صحافیوں کا گروپ بیت المقدس کے بعد رام اللہ، الخلیل اور بیت لحم کا بھی دورہ کرے گا۔ اس دورے کے دوران صحافی فلسطینی اور اسرائیلی حکومت کی اہم شخصیات کے انٹرویو بھی کریں گے۔ فلسطینی اتھارٹی کے سربراہ محمود عباس سے بھی ملاقات کی جائے گی۔