رپورٹ کے مطابق بدھ کی شام فلسطین کے مقبوضہ مغربی کنارے کے شہر طولکرم میں ایک فوجی چوکی کے قریب فلسطینی شہریوں کی جانب سے فائرنگ کے نتیجے میں دو یہودی فوجی زخمی ہوگئے۔
رپورٹ کے مطابق زخمی ہونے والے ایک فوجی اہلکار کی حالت تشویشناک بیان کی جاتی ہے۔
الخلیل شہر میں اسرائیلی فوجیوں نے 20 سالہ فلسطینی نوجوان عبدالرحمان یسری مسودہ کو گولیاں مار کر شہید کردیا۔ اس پرالزام عاید کیا تھا کہ اس نے چاقو سے حملے میں دو اسرائیلی فوجیوں کو زخمی کیا ہے۔
اسرائیلی جارحیت میں دسیوں زخمی
درایں اثناء فلسطینی طبی ذرائع اور ہلال احمر فلسطین کی جانب سے جاری کردہ بیانات میں بتایا گیا ہے کہ بدھ کے روز غرب اردن میں صہیونی فوج کے حملوں کے نتیجے میں 53 فلسطینی زخمی ہوگئے۔ بیان میں بتایا گیا ہے کہ مغربی کنارے میں اسرائیلی فوج کی جانب سے مظاہرین پر براہ راست فائرنگ سے 5 فلسطینی زخمی ہوئے۔ چار افراد کو دھاتی گولیوں سے نشانہ بنایا گیا جس کےباعث وہ لہو لہان ہوگئے۔ 43 فلسطینی آنسوگیس کی شیلنگ سے زخمی ہوئے ہیں۔ زخمیوں میں سے بعض کو اسپتالوں میں منتقل کردیا گیا ہے جب کہ زیادہ تر شہریوں کو موقع پر ہی طبی امداد فراہم کی گئی تھی۔
فلسطینی ذرائع ابلاغ کے مطابق کل بدھ کو فلسطین کے مغربی کنارے کے شہروں اور بیت المقدس میں کئی مقامات پر فلسطینیوں اور اسرائیلی فوج کے درمیان تصادم ہوا۔
مغربی کنارے میں رام اللہ، طولکرم، طوباس، الخلیل اور بیت لحم میں جھڑپیں ہوئیں جہاں فلسطینیوں نے صہیونی فوجیوں پر سنگ باری کی۔
ادھر رام اللہ میں سلواد قصبے، مغربی طولکرم میں خضوری یونیورسٹی کے اطراف اور طوباس میں الفارعہ کیمپ میں جھڑپیں ہوئیں جب کہ بیت المقدس میں الرام کے مقام پر بھی پرتشدد واقعات رونما ہوئے ہیں۔