اسرائیل کی ایک انتہا پسند یہودی تنظیم نے انتہائی سنگین اور اشتعال انگیز دھمکی دیتے ہوئے مسجد اقصیٰ کوشہید کرنے کا مطالبہ کیا ہے۔ یہ دھمکی ایک ایسے وقت میں سامنے آئی ہے جب یہودی شرپسند روز مرہ کی بنیاد پر مسجد اقصیٰ کے بے حرمتی کا سلسلہ جاری رکھے ہوئے ہیں۔
رپورٹ کے مطابق ’’جبل ھیکل کی طرف واپسی‘‘ نامی انتہا پسند گروپ نے سماجی رابطے کی ویب سائیٹ ’’فیس بک‘‘ پر ایک ویڈیو فوٹیج پوسٹ کی ہے جس میں دھمکی دی گئی ہے کہ یہودی جبل ہیکل[مسجد اقصیٰ] کو غیروں اور ناپاک لوگوں سے پاک کرنے کا ارادہ رکھتے ہیں۔ یہودی گروپ مسجد اقصیٰ کو جبل ہیکل اور فلسطینی مسلمانوں کو غیر اور ناپاک لوگ قرار دیا۔یہودی گروپ کی جانب سے یہ دھمکی آمیز ویڈیو ایسے وقت میں منظرعام پرآئی ہے جب اسرائیل بھرمیں ’’حانوکا‘‘ نامی ایک مذہبی تہوار منایا جاتا ہے۔
اس فوٹیج میں دکھائے گئے چار یہودی شرپسندوں نے پرانے دور کے یہودی جنگجوؤں کے لباس میں دکھایا گیا ہے۔ ان میں ایک یہودی آگے بڑھ کر تلوار لہراتا ہے اور دوسرے یہودیوں سے مسجد اقصی کی طرف اشارہ کرتے ہوئے کہتا ہے کہ اس [مسجد اقصیٰ] کا فیصلہ اب تلوار کرے گی۔ یہ مسجد یہودیوں کے مقدس مقام کی جگہ بنائی گئی ہے مگر اس پر غیروں اور خبیث لوگوں کا قبضہ ہے۔ اب وقت آگیا ہے کہ یہودی اپنے مقدس مقام کو ناپاک فلسطینیوں سے چھڑائیں۔